VM i skiskyting i Khanty- Mansijsk 03.03.2011:

Tarjei Bø verdsmeister

-GULL til Noreg i mixed-stafett!

Tarjei Bø fekk ein fantastisk start på VM i Khanty-Mansjisk då han vart verdsmeister saman med resten av det norske laget på blanda stafett. Det norske laget bestod av Tora Berger, Ann Kristin Aafedt Flatland, Ole Einar Bjørndalen og Tarjei Bø. Det er første gong Noreg tek VM gull på mixed-stafett!

Tora Berger gjekk første etappe og førte Noreg opp i leiinga. Ho sendte Ann Kristin Aafedt Flatland ut på andre etappe med 16 sekund føresprang. Også Ann Kristin gjekk ein god etappe, men etter å ha brukt to ekstraskot gjekk raske Magdalena Neuner Tyskland opp i teten. Ved veksling skilde det vel 20 sekund.

Ole Einar Bjørndalen var tilbake i god konkurranseform og held avstanden til Tyskland på sin tredje etappe. Dermed vart Tarjei Bø sendt ut på siste etappe med 23, 9 sekund å ta igjen på teten. Tarjei gjekk som vanleg godt i sporet og med ei perfekt første skyting var han opp i ryggen på Michael Greis. Fram til andre skyting hadde han fått ei fin leiing på tyskaren og med kjapp ståande skyting og berre eit ekstraskot var sigeren sikra. Siste runden vart ein rein maktdemonstrasjon der Tyskland vart regelrett parkert. Dermed var Noreg verdsmeister i mixed-stafett for første gong. Tyskland tok sølvmedaljen medan det franske laget sikra seg bronse.

Gratulerer som verdsmeister Tarjei!

Laurdag held VM fram med sprint for herrar kl.10.00 på NRK. Tarjei Bø er sjølvsagt på start så følg med!!